Әбдіғаппар Әшімұлы Әшімов
ҚазПТИ-дің 1960 жылғы түлегі, техника ғылымдарының докторы Әбдіғаппар Әшімұлы Әшімов институттың ректоры болып тағайындалды. 1975 жылы Қазақ политехникалық институтының энергетика факультеті негізінде Алматы энергетика институты ұйымдастырылды. 1978 жылы институт құрамынан Рудный индустриялды институты жеке бөлініп шықты. 1979 жылы ҚазПТИ-ден Алматы Сәулет-құрылыс институты бөлініп шықты. Қазіргі Қазақ Бас Сәулет-құрылыс академиясы. В.И.Ленин атындағы Қазақ политехникалық институтында жинақталған іс-тәжірибелерді саралау негізінде республикадағы техникалық оқу орындары арасында бірінші рет мамандар дайындау сапасын басқарудың комплексті жүйесі (МДСБКЖ) жасалып, табысты енгізілді. Тәжірибе көрсеткендей, жалпы МДСБКЖ-ны құру мен енгізуге байланысты іс-шаралар институттың бүкіл ұйымдастырушылық қызметінің дамуын қамтамасыз етті. ҚазПТИ Куба, Моңғолия, Ауғанстан және басқа да дамушы елдер үшін мамандар дайындаушы базалық институттардың біріне айналды. ҚазПТИ-дің жанынан халық мәдени университеті ашылды. 1984 жылғы 26 шілдеде КСРО Жоғары Кеңесі Президиумының Жарлығы бойынша Еңбек Қызыл Ту орденімен марапатталды.