Досым Қасымұлы Сүлеев
Қазақстан Республикасының Білім және ғылым министрі бұйрығымен Досым Қасымұлы Сүлеев университет ректоры қызметіне тағайындалды. Ол – институттың 1970 жылғы түлегі, ірі ғалым, басқару және автоматтандыру, білім берудің қазіргі заманғы технологиялары саласының маманы. Досым Қасымұлы – көптеген жылдар бойы ҚР Ғылым және білім беру Министрлігінде және жоғары оқу орындарында басшылық жұмыстар атқарған, жоғары мектеп жүйесіндегі оқу-тәрбие және ғылыми жұмыстардың тәжірибелі, талантты ұйымдастырушысы. Университеттердің Ұлы хартиясына қол қойды және Болон процесіне белсене кірісті. 2004-2005 оқу жылынан бастап ҚазҰТУ АҚШ пен Европалық Одақта қабылданған білім берудің несиелік технологиясына көшеді. 2000 жылмен салыстырғанда ғылымды қаржыландырудың жалпы көлемі 12 еседен аса өсті. 2002 жылдың жазында ҚазҰТУ студенттері Қазақстанның бірден-бір өкілі ретінде Жапонияда өткізілген «РОБОКОН» роботтардың командалық конкурсына қатынасып қайтты. «Самғау» атты үздік түлектер фестивалі алғаш рет өтті. Қ.И.Сәтбаев атындағы ҚазҰТУ-дың Ғылыми кеңесі Мебиус лентасының көлбеу айқастырылған түрдегі ерекше белгісін төлтаңба ретінде бекітті және университеттің Әнұранын бекітті. Университет «Жылдың үздік жоғары оқу орны» номинациясының жеңімпазы атанды. Университетімізден 16 жас оқытушы, студент Туркияның, Ресейдің, КХР-ның, Нидерланд Корольдігінің, Германия мен Францияның оқу орындарына тәжірибеден өтуге жіберілді. Қ.И.Сәтбаев атындағы ҚазҰТУ 2003 жылы Париж қаласында Gold категориялы Халықаралық International Star Award сыйлығы мен диплом-сертификатымен марапатталды. Жүлде Қ.И.Сәтбаев атындағы ҚазҰТУ-дың ректоры, техника ғылымдарының докторы, профессор Д.Қ.Сүлеевке XX халықаралық WQC (World Quality Commitment) Конвенциясының салтанатында берілді. Қ.И.Сәтбаев атындағы ҚазҰТУ ТМД елдері мен Орта Азиядағы мұндай жоғары марапатқа ие болған бірінші университет.