Өмірхан Аймағамбетұлы Байқоңыров
Институт директоры қызметіне ҚазТКМИ түлегі (1940), тау-кен инженері, Жезқазған шахта басқармасының бастығы, Қазақ КСР Жоғарғы Кеңесінің депутаты, техника ғылымдарының кандидаты Өмірхан Аймағамбетұлы Байқоңыров тағайындалды. Ғылымға деген талпыныс, өндірістік процестерді жақсы білуі оған жоғары оқу орнын басқаруға көмектесті. Ол институт ректоры қызметін атқару барысында еліміздегі алғаш инженерлік-техникалық жоғары оқу орнының қалыптасуы мен дамуында өте көп істер тындырды. 1953 жылы ҚазТКМИ ғылыми-студенттер қоғамы 34 үйірменің басын қосты, оларға 700-ге тарта студент мүше болды. Геологиялық мұражай құрылды. Ол 10 жыл бойы қабылданған әрбір оқу тобының әлеуметтік және ұлттық құрамын, яғни қала мғен ауыл мектебін бітіргендер (орыс және қазақ мектебі)арақатынасы 50 де 50 % болуын өзі кірісіп, анықтап отырды. Осы айтылғандардан басқа осы жылдар бойы өнеркәсіп салаларынан тәжірибелі және біліктілігі жоғары мамандарды педагогикалық қызметке шақырып жүрді. Ө.А.Байқоңыров студенттердің тұрмыс жағдайын жақсартуға бар күшін салды, институт аумағында жаңа жатақханалар, профессорлық-оқытушылық құрамға тұрғын үйлер салғызды. 1959-1960 жылдары қазақ жастары институттың барлық студенттерінің 40% -ын құрады. КСРО Министрлер Кеңесінің 1960 жылғы 8 шілдедегі №2006-р Жарлығымен Қазақ кен-металлургия институты Қазақ политехникалық институты болып қайта құрылды. Осы кезден бастап институттың бұдан әрі дамуы материалдық-техникалық тұрғыдан да, мамандықтарды кеңейту тұрғысынан да кең өріс алды.