Ерғали Нүсіпұлы Нүсіпов
Қ.И.Сәтбаев атындағы ҚазҰТУ ректоры болып В.И.Ленин атындағы ҚазПТИ-дің түлегі, геология-минералогия ғылымдарының кандидаты, профессор Ерғали Нүсіпұлы Нүсіпов тағайындалды. 2000 жылы ҚР ЖАҚ-тың негізінде ҚазҰТУда 14 мамандық бойынша докторлық диссертациялық кеңесі, 3 мамандық бойынша 2 кандидаттық диссертация қорғау кеңесі ашылды. Осы жылдың наурыз айында факультеттер негізінде 6 институт құрылды. Университеттің редакциялық бөлімі мен баспа-көбейту бөлімшесі негізінде баспа орталығы құрылды. 2000 жылдың қазан айында «Рас» газетінің бірінші нөмірі жарыққа шықты. «Бәйшешек» әдеби бірлестігінің жұмысы қайта жалғасын тапты. ҚР Президенті Н.Ә.Назарбаевтың Жарлығымен Қ.И.Сәтбаев атындағы ҚазҰТУ-ға ұлттық және жалпы адамгершілік құндылықтар, ғылым мен техника жетістіктері негізінде жеке адамды қалыптастыру, дамыту және кәсіптік өсуіне қосқан зор үлесі үшін ерекше ұлттық мәртебе берілді.